Produksionet e serialeve ku mori pjesë, nuk ia paguan me vite të tëra Edona Reshitajt obligimet në Trust – reagon aktorja

Të premten është hapur aplikimi online në Fondin e Kursimeve Personale – Trust, ku qytetarët e Kosovës kanë të drejtë tërheqjeje deri në 10 për qind të kursimeve personale.

Teksa mbi 200 mijë aplikime u pranuan deri në pak orë të premten, duket se pati edhe prej atyre që mbeten të zhgënjyer nga mundësia e tërheqjes.

Ky është rasti i aktores dhe këngëtares, Edona Reshitaj, e cila ka qenë pjesë e shumë serialeve televizive në vend, përfshirë edhe prodhimeve vendore të Radio Televizionit të Kosovës.

Por përkundër kësaj, duket se disa prej serialeve nuk i kanë kryer shërbimet e pagesës në Trust për të punësuarën në rastin konkret aktoren, pasi e njëjta të premten kur ka aplikuar për tërheqje parash, ka parë se nuk posedon shumën që mendonte se kishte në fondin e kursimeve personale.

Këtë Reshitaj e bëri të ditur përmes një statusi në rrjetin social Facebook, duke pyetur njëkohësisht ndjekësit e saj se cila është rruga që duhet ndjekur në raste të tilla, si gjendja në të cilën ndodhet për momentin artistja.

“Në disa seriale televizive ku unë kam marrë pjesë me vite të tëra, në rrogë m’i kanë ndalë paratë për Trust, por në Trust nuk më figurojnë ato pare sepse produksioni nuk i ka paguar. A ka dikush përgjigje për këto raste, apo a mund të inicohet diçka e tillë nga të gjithë ata artistë që kanë kaluar nëpër këto eksperienca të padrejta?”, ka shkruar Edona Reshitaj në Facebook.

Edona përveçse një aktore të suksesshme, ka një karrierë mjaft të zhvilluar edhe në këndim dhe shquhet për interpretimin e saj live. /Telegrafi/