Milingonat mund të nuhasin kancerin në urinën e tyre, tregon një studim i ri – Alsat

Hulumtimet e reja tregojnë se milingonat mund të zbulojnë tumoret kancerogjene falë receptorëve të tyre të fortë të erës.

– Milingonat mund të përdoren si biodetektorë për të dalluar individët e shëndetshëm nga ata me tumore. Ato janë të lehta për t’u trajnuar, mësojnë shpejt, janë efikas dhe nuk kushtojnë shtrenjtë për t’u mbajtur – shpjegon Patricia D’Etore, bashkëautore e hulumtimit dhe shkencëtare nga Universiteti Sorbonne Paris Nord.

Autori kryesor i studimit, Baptiste Piquére, një etolog në Universitetin Sorbonne Paris Nord, dhe ekipi i tij filluan me ksenografikimin e tumoreve të kancerit të gjirit te minjtë, duke i lejuar ata të rriten. Më pas ata morën mostra të urinës nga minjtë e shëndetshëm dhe minjtë me tumore.

Gjatë hulumtimit, shkencëtarët ekspozuan 70 milingona (formica fusca) ndaj mostrave të urinës nga minjtë e shëndetshëm dhe ata me tumore. Pas tre provash, milingonat ishin në gjendje të dallonin erën e urinës së minjve të shëndetshëm nga ata me kancer. Hulumtimi i fundit bazohet në një studim të mëparshëm nga Dr Patricia dhe kolegët e saj, i cili tregoi se milingonat mund të ‘ndjejnë’ qelizat e kancerit të njeriut të rritura në laborator.

– Ne arritëm t’i mësojmë ata të lidhin një erë të caktuar, pra urinën e minjve të sëmurë. Ne kemi treguar se ata mund të bëjnë dallimin midis urinës së minjve të shëndetshëm dhe urinës së minjve me tumor. U habitëm se sa efektive dhe të besueshme janë milingonat – tha Dr. Patricia.

Në fazën tjetër të hulumtimit, shkencëtarët do të hetojnë nëse milingonat mund të bëjnë të njëjtën gjë me urinën e njeriut. Hulumtimet e mëparshme kanë treguar se qentë, nëse trajnohen, mund të zbulojnë kancerin në urinë. Ekzistojnë gjithashtu pajisje elektronike që mund të zbulojnë lloje të caktuara të kancerit – si kanceri i fshikëzës, gjirit ose prostatës – nga mostrat e urinës.