Kodra e Diellit, përurohet sërish teleferiku – Alsat

11 muaj më parë u lëshua zyrtarisht në përdorim teleferiku me gjashtë ulëse. Përurim të lëshimit në përdorim në Kodrën e Diellit pati sërish sot. Itinerari ishte i njëjtë, pothuajse edhe zyrtarët ishin po ata.

Teleferiku që nga përurimi një vit më parë ishte jofunksional. Arsyetimi i ELEM-t ishte se borxhet ndaj ndërtuesit pamundësuan përdorimin, ndërsa sot Bekteshi doli me deklaratë krejt ndryshe. Sipas tij teleferiku i cili është panoramik nuk ka funksionuar për shkak se një vit më parë nuk kishte borë.

“Vitin e kaluar nuk kishte borë dhe skijatorët nuk mundën ta shfrytëzojnë edhe këtë ski lift por edhe Kodrën e Diellit”, tha Kreshnik Bekteshi, Ministër i Ekonomisë.

Ministër ky ski lift nuk është vetëm për skiatorët por edhe panoramik?

“Ne mendojmë se ski lifti duhet të lëshohet atëherë kur ka interes nga ana e qytetarëve  dhe atëherë kur mundet të vendoset në përdorim”, tha Bekteshi.

Nisma “Ta shpëtojmë Kodrën e Diellit” e sheh me skepticizëm funksionimin e teleferikut më gjashtë ulese.

“Shpresojmë te jetë e treta e vërteta dhe nuk do ketë më lëshim të teleferikut me gjashtë ulëse, sepse vonesat i dimë gjithë, filluan në 2012 me dokumentacion, në 2014-15 me ndërtim, 2021 me lëshim dhe sot ja u lëshua.”, pohoi Hamdi Sulejmani. Nisma “Ta shpëtojmë Kodrën e Diellit”.

Nga ana tjetër drejtori i ri i ELEM Turs Adem Avziu, njëjtë sikurse paraardhësi i tij, paralajmëroi investime në Kodrën e Diellit.

“Ne kemi planet tona ta rregullojmë një herë infrastrukturën, planifikoj që për sezonin e radhës të kemi edhe tualete publike, do e rregullojmë infrastrukturën, do i rregullojmë edhe ski liftat tjerë që kanë nevojë për renovim apo ndërrim”, theksoi Adem Avziu. Drejtor i ELEM Turs.

Bashkim Sulejmani