“Edhe unë jam Klodiani”, Stresi i bashkohet protestës për vrasjen e 25 vjeçarit nga policia

Arkimed Lushaj apo siç njihet me emrin artistik Stresi, ka qenë po ashtu i pranishëm në protestën e thirrur pasditen e sotme (e mërkurë) para Ministrisë së Brendshme në Tiranë për të dënuar vrasjen e 25 vjeçarit, Klodian Rasha.

“Edhe unë jam Klodiani”, ka thënë Stresi në fillim të protestës.

Të pranishmit bënë thirrje që protesta të vijojë edhe përtej orës 22:00, kur nis ndalimi i qarkullimit.

“Kush po pjerdh për lëvizjen e tyre? Nuk e kemi problem as orën 22, as 23 dhe as 24. Nuk i trembemi jo këtij këtu por as atij të gjatit që duhet me e kap me këtë cepin e çadrës këtu. Ne jemi këtu”, vazhdoi më tej reperi i njohur.

I njëjti më pas kërkoi një minutë heshtje për të riun që mbeti viktimë dhe për familjen e tij, para se të vijonin marshimin drejt Ministrisë së Brendshme.

“Të gjithë jemi Klodiani sot”, shtoi ai.

Më pas pjesëmarrësit shpërthyen me thirrjet “Turp turp”, “ik ik”, “poshtë komunizmi”.

Lidhur me këtë ngjarje, reagimet ishin të shumta edhe nga personazhe të tjera të famshme shqiptare. /Telegrafi/

Foto: Ora News