Noizy pjesë e filmit ndërkombëtar “Blood Money”, nga 12 nëntori shfaqet në kinematë e Zvicrës

Filmi “Blood Money”, në të cilin interpretojnë emra të njohur të aktorëve shqiptarë dhe ndërkombëtarë, do të nisë shfaqjen në kinematë e Zvicrës nga 12 nëntori, shkruan Telegrafi.

Në mesin e kastit të filmit është edhe reperi i njohur Rigels Rajku, i njohur si Noizy, i cili interpreton personazhin e Arionit. Krahas tij, në film luajnë edhe Blerim Destani, Ndriçim Xhepa, Kaona Sylejmani, Xhejn Fama dhe aktori gjerman Moritz Bleibtreu.

Një histori që zhvillohet në botën e luftimeve ilegale

Ngjarja e filmit zhvillohet në qytetin e Durrësit, ku një arenë ilegale e luftimeve, e njohur si “The Circle”, shërben si pikëtakim për bixhozxhinjtë, kriminelët dhe politikanët e korruptuar. Në këtë botë, ku dhuna kthehet në spektakël dhe gjithçka ka një çmim, ndërthuren historitë e dy personazheve që luftojnë për të ardhmen dhe lirinë e tyre.

Arioni, një ish-i burgosur dhe luftëtar i fuqishëm, përfshihet në një format ndërkombëtar të luftimeve pa doreza, ndërsa Iliri, menaxheri i tij, i zhytur në borxhe dhe baste, përpiqet të ndryshojë fatin e tij përmes suksesit të luftëtarit. Megjithatë, rrugëtimi i tyre i përball me një rrjet të rrezikshëm bastesh ilegale, tradhti dhe zgjedhje të vështira.

Miqësi, tradhti dhe luftë për liri

Teksa Arioni ngjitet drejt majave të garës, miqësia e tij me Ilirin vihet në provë. Një ofertë prej 100 mijë eurosh, një pasaportë e re dhe mundësia për të nisur një jetë nga e para e vendosin luftëtarin përballë dilemës mes lirisë personale dhe besnikërisë ndaj mikut të tij.

“Blood Money” trajton tema si miqësia, tradhtia dhe lufta për dinjitet, duke sjellë një histori aksioni dhe drame në një botë ku gjithçka ka çmimin e vet.

Kush janë aktorët e filmit?

Përveç Noizyt dhe Blerim Destanit, në kastin e filmit janë edhe Ndriçim Xhepa, Kaona Sylejmani, Xhejn Fama dhe Moritz Bleibtreu.

Pjesë e kastit janë gjithashtu Ola Harizaj, Sunaj Raca, Kastriot Caushi, Elidon Aliko, Kastriot Shehi, Ilirda Bejleri, Ervin Bejleri, Kida Khodr Ramadan, Welsch Achim, Veysel Gelin, Islam Dulatov dhe Nelson Hysa.

“Blood Money” nga 12 nëntori në Zvicër

Filmi “Blood Money” do të nisë shfaqjen në kinematë zvicerane më 12 nëntor, duke sjellë në ekran një produksion me pjesëmarrjen e aktorëve shqiptarë dhe ndërkombëtarë./Telegrafi/