Lajm i mirë për fansat e “John Wick” – Keanu Reeves rikthehet në rolin e famshëm

Aktori Keanu Reeves do të rikthehet në “John Wick”, por këtë herë jo vetëm në ekranin e madh, por edhe në një videolojë të re me buxhet të lartë, e cila po zhvillohet nga studioja Saber Interactive.

Reeves do t’i japë personazhit zërin dhe pamjen e tij, ndërsa në projekt është përfshirë edhe regjisori i katër filmave të kësaj sage, Chad Stahelski.

Videoloja do të jetë një aksion me një lojtar, e parë nga perspektiva e personit të tretë.

Keanu

Ngjarjet do të zhvillohen disa vite para filmit të parë të vitit 2014, duke sjellë një version më të ri të John Wick, në kohën kur ai ishte ende një vrasës me pagesë.

Historia do të zbulojë më shumë për të kaluarën e tij, ndërsa krahas personazheve të njohur do të shfaqen edhe figura të reja të krijuara posaçërisht për lojën.

Aksioni do të përfshijë përleshje fizike, shkëmbime zjarri, arte marciale dhe skena me automjete, duke synuar të sjellë stilin karakteristik të filmave.

Sipas zhvilluesve, versioni i ri i Wick do të ketë një mënyrë më të ashpër dhe instinktive të luftimit, ndryshe nga lëvizjet më të rafinuara që publiku njeh nga filmat.

– YouTube www.youtube.com

Loja po zhvillohet për PlayStation 5, Xbox Series X/S dhe kompjuterë, por ende nuk është bërë i ditur titulli zyrtar apo data e publikimit.

Edhe pse është përmendur viti 2028 si mundësi, studioja ka sqaruar se ky afat nuk është konfirmuar zyrtarisht.

Ndërkohë, fansat e sagës presin edhe filmin e pestë të “John Wick”, zhvillimin e të cilit e ka konfirmuar tashmë kompania Lionsgate, me Reeves që pritet të rikthehet në rolin kryesor.

Saga nisi në vitin 2014 dhe, përveç katër filmave, është zgjeruar edhe me serialin “The Continental” dhe filmin “Ballerina”. /Telegrafi/